ਭਾਈ ਹਰਿਭਜਨ ਸਿੰਘ ਯੋਗੀ , ਯੋਗੀ ਭਜਨ ਬਾਰੇ ਪੰਜਾਬੀ ਵਿਚ ਲਿਖੀ ਗਈ ਪਹਿਲੀ ਕਿਤਾਬ 'ਸਿੰਘ ਯੋਗੀ' ਨੈੱਟ ਤੇ ਉਪਲਬਧ ਕਰਵਾਉਣ ਦੇ ਮਕਸਦ ਨਾਲ ਇਹ ਵਿਸ਼ੇਸ਼ ਬਲੌਗ ਤਿਆਰ ਕੀਤਾ ਗਿਆ ਹੈ। ਇਹ ਕਿਤਾਬ ਪੰਜਾਬ ਵਿਚ ਪਹਿਲੀ ਵਾਰੀ 2005 ਵਿਚ ਛਪੀ ਸੀ। 219 ਸਫਿਆਂ ਦੀ ਇਹ ਕਿਤਾਬ ਯੋਗੀ ਜੀ ਦੇ ਜੀਵਨ ਤੇ ਉਨ੍ਹਾਂ ਦੀ ਵਿਚਾਰਧਾਰਾ ਤੇ ਵਿਸਥਾਰ ਵਿਚ ਚਰਚਾ ਕਰਦੀ ਹੈ। ਇਹ ਕਿਤਾਬ ਲਿਖਣ ਲਈ ਮੈਂ ਕੁਝ ਸਮਾਂ ਯੋਗੀ ਜੀ ਨਾਲ ਅਮਰੀਕਾ ਦੇ ਨਿਊ ਮੈਕਸੀਕੋ ਪ੍ਰਾਂਤ ਸਥਿਤ ਉਨ੍ਹਾਂ ਦੇ ਆਸ਼ਰਮ ਵਿਚ ਵੀ ਬਿਤਾਇਆ ਸੀ। ਇਸ ਦੌਰਾਨ ਮੈਂ ਯੋਗੀ ਜੀ ਨਾਲ ਜੁੜੇ ਹੋਏ ਵੱਖ ਵੱਖ ਲੋਕਾਂ ਨਾਲ ਮੁਲਾਕਾਤਾਂ ਕੀਤੀਆਂ। ਇਨ੍ਹਾਂ ਵਿਚ ਉਸ ਪੀੜ੍ਹੀ ਦੇ ਲੋਕ ਵੀ ਸਨ, ਜਿਹੜੇ ਸੱਤਰਵਿਆਂ ਦੇ ਮੁਢ ਵਿਚ ਪਹਿਲੀ ਵਾਰ ਯੋਗੀ ਜੀ ਦੇ ਸੰਪਰਕ ਵਿਚ ਆਏ ਅਤੇ ਅਮਰੀਕੀ ਸਿੱਖਾਂ ਦੀ ਦੂਜੀ ਪੀੜ੍ਹੀ ਦੇ ਲੋਕ ਵੀ ਸ਼ਾਮਲ ਸਨ। ਇਸ ਸਮੁਚੇ ਕਾਰਜ ਲਈ ਸਿਖ ਧਰਮਾ ਸੰਸਥਾ ਦੀ ਮੁਖ ਪ੍ਰਸਾਸ਼ਕੀ ਅਫਸਰ ਨਿਰੰਜਨ ਕੌਰ ਖਾਲਸਾ ਤੇ ਡਾ ਬਲਕਾਰ ਸਿੰਘ ਸਾਡੇ ਵਿਸ਼ੇਸ਼ ਧੰਨਵਾਦ ਦੇ ਪਾਤਰ ਹਨ। ਮੈਂ ਤੇ ਮੇਰੇ ਦੋਸਤ ਬਲਰਾਮ ਲਈ ਇਸ ਕਿਤਾਬ ਦਾ ਲੇਖਨ ਮਹਿਜ਼ ਇਕ ਪ੍ਰੋਫੈਸ਼ਨਲ ਕਾਰਜ ਨਹੀਂ ਸੀ ਬਲਕਿ ਇਸ ਨੇ ਸਾਡੇ ਆਪਣੇ ਆਤਮਿਕ ਵਿਕਾਸ ਤੇ ਵੀ ਗਹਿਰਾ ਅਸਰ ਪਾਇਆ। ਮੈਨੂੰ ਇਹ ਕਹਿਣ ਵਿਚ ਕੋਈ ਝਿਜਕ ਨਹੀਂ ਕਿ ਇਸ ਕਾਰਜ ਨੇ ਸਾਡੇ ਜੀਵਨ ਤੇ ਇਕ ਚਿਰ ਸਥਾਈ ਛਾਪ ਛੱਡੀ ਹੈ। ਸਾਡੇ ਲਈ ਇਹ ਮਹਿਜ਼ ਇਕ ਕਿਤਾਬ ਨਹੀਂ ਸਗੋਂ ਇਕ ਆਤਮਿਕ ਯਾਤਰਾ ਹੋ ਨਿਬੜੀ। ਇਹ ਕਿਤਾਬ ਯੋਗੀ ਜੀ ਦੇ ਸਿਰਫ ਯੋਗੀ ਜੀ ਦੇ ਨਿੱਜੀ ਜੀਵਨ ਦੇ ਵੇਰਵਿਆਂ ਦਾ ਬਿਆਨ ਨਹੀਂ ਹੈ, ਬਲਕਿ ਇਸ ਵਿਚ ਨਿਊ ਏਜ ਰੂਹਾਨੀ ਲਹਿਰਾਂ ਦੇ ਸਿਧਾਂਤਕ ਤੇ ਵਿਚਾਰਧਾਰਕ ਅਧਾਰਾਂ ਦੀ ਚਰਚਾ ਕੀਤੀ ਗਈ ਹੈ।
ਕਿਤਾਬ ਯੂਨੀਸਟਾਰ ਬੁਕਸ ਚੰਡੀਗੜ੍ਹ ਦੁਆਰਾ ਪ੍ਰਕਾਸ਼ਿਤ ਕੀਤੀ ਗਈ। ( www.unistarbooks.com ਤੇ ਫੋਨ ਨੰਬਰ਼: 91-172-5077427, 5077428 )

ਸ਼ਮੀਲ

www.shameelonline.com